نصائح ذهبيه عند بدايه مشي الطفل

بدايه مشي الطفل

مواقف عند بدايه مشي الطفل

مقال منقول اعجبني يفيدك عندما يبدأ ابنك في المشي فانتبهي جيدا لما قد يحدث معه وتمتعي انتي وزوجك بهذه اللحظات الجميله وهذه المرحله في حياه طفلك

لما المحروس ابنك يبتدي يمشي لازم تعرفي ان حياتك داخلة علي منعطف تاريخي

خلاص فرحنا و صقفنا و قولنا برافو.

نلبس في الجد بقي..عايزاكي تفتحي مخك معايا شوية في الكلام الجاي ده:

النصيحة الذهبية اللي اقدر اقولك عليها ” حلقي عليه “.. أبوس رجلك حلقي عليه..عشان ترحمي نفسك من اللي هيتقال ده..

– ابنك لو غاب عنك 5 ثواني فا دي كفيلة انك تلاقي حلل المطبخ كلها واقعة علي الأرض و حاطط المغارف جوه الفانلة و راسه غرقانه صلصة و طبيخ ..هتلاقي الرز و المكرونة مدلوقين علي الأرض و مكسر 5 اطباق و بيقرقش إزازهم و ضحكته من الودن للودن..

– باسكيت الزبالة بتغنيله ” بناديك تعالي “، طول اليوم هتلاقيه بيحاول يوصلها و يحط راسه جواها او يلحس الكيس

– غالباً هتلاقي خلال اول سنة مشي فيها واكل 10 علب من كريم التسلخات بتاعه..حتي لو مخبياه منه فوق التلفزيون بيعرف يوصله ابن العفريتة ده. ف لما تطلعي تلاقي وشه كله مدهون ابيض و عمال ياكل فيه متخافيش..ان شاء الله هتعدي علي خير..

– هتلاقي المحروس بيجري بسرعة 300 كم في الفسوة لو لقي باب الحمام مفتوح، و غالباً هتلاقيه حاطط ايده في البلاعة و بياكل الله اعلم ايه أو بيسرح شعره بفرشة التواليت..استهدي بالله و حاولي تحتوي الموقف..

– يا جمال فيش الكهربا و الصعق بالكهربا و انه ياخد بنسه و يحطها في الكوبس…يا جماااااله..خبي ياختي كل الفيش، محدش ناقص.. خبيهم بكنب خبيهم ورا ستاير..اتصرفي..

– اه هيلحس الجزم و هيقلب الشباشب و ياكلها و المصيبة انه هيستطعمهم المقرف ده و ممكن يدمنهم، ما تتكسفيش لما تقولي ابني بيعمل دماغ شباشب زيكو و شرابات..

– اقفلي غطا التواليت يا حبيبتي، انتي فاكرة ابنك شعره اتبل ازاي، ده دخل راسه جواه و خد غطس يا فالحة..

– ابنك عينه هتلمع لو لمح موبايل أو ريموت كنترول او ريسيفر..هيبقي عنده اصرار خزعبلي انه يمسكهم و يخربهم.. و هيوصلهم مهما عملتي..

– نصيحة اقفلوا كل الادراج و الابواب خصوصا باب التلاجة عشان لو عرف يفتحها مرة ممكن تدوري عليه بعد كده تلاقيه بيلعب بالمكعبات في رف الخضار اللي تحت..

– في السن ده هتلاقي بق ابنك علطول بيلعب..سيبيه عشان ممكن تلاقي محل خردوات جوه..كله هينزل مع اللي بينزل.. انتي عايشة مع مكنسة 5000 وات يا حبيبتي..

– الغذاء الرسمي للأطفال في السن ده ورق الكلينيكس..متقلقيش منه..ده سيليلوز.. هضمه سهل ان شاء الله..

– طول ما هو صاحي ما تتكلميش في التليفون و تندمجي..عشان اللحظة اللي بيغيب فيها عن نظرك بيعمل فيها البدع..

– البوتاجاز و الفرن بالنسباله حلم العمر تلاقيه مني عينه يفتح الفرن و يقعد جوه جنب الفرخة اللي بتتشوي جوه

– في بوكس اللعب بتاعه معالق تلاقي،كبشة تلاقي، غطا حلة تلاقي، ايشاربك اللي ضايع بقاله شهر تلاقي ، بطارية الريموت اللي قلبتوا عليها الدنيا..كله في البوكس اللعين ده

– ابنك هياكل صوابع الروج و كريم الأساس و هيرسم خرايط علي جسمه بقلم الكحل..اديني قولتلك اهو.

– عادي تلاقيه قرر يقلع البامبرز و ماشيلك في الشقة يا مولاي كما خلقتني..سيبي الشاب يقعد علي راحته..و ربنا يكون في عون سكان البيت بقي

– الاطفال في السن ده عندها قدرة خارقة علي اكل الفتافيت و اي حاجة واقعة علي الارض..زرار..خرزة..فتلة..و هتكتشفي ده و انتي بتغيريله..صدقيني هتنبهري..

– من الآخر اي حاجة ضايعة منكوا في البيت هتلاقيها في البامبرز.. اصبري علي رزقك..

– خلي عينك وسط راسك 48 ساعة في ال 24 ساعة و كلها 10 سنين و يعقل ان شاء الله..

_ Copied

x